"တဖာလုံ တဆိုင် ယိုင်တိုင်တိုင် အနာဂတ်"

ရန်ကုန်မြို့ ညအလှမှာ အေးမြသာယာလျက်ရှိ၏။ ဆောင်းဓာတ် နှင့်ဆောင်းလေပြေက ၀မ်းတွင်းကလီစာများသို့တိုင် ချမ်းအေးစေခဲ့ရာ ကမ္ဘာသား၏ ဓမ္မတာသဘောအရ တေဇောဓာတ်ကို ချင်ခြင်းတက် လာသည်။

မြို့ပြ၀န်းကျင်တခွင်အား ဆင်ခြင်မိရာ ယမကာဆိုင်များက အနန္တ၊ တဖာလုံတဆိုင်ဟုဆိုရမလို။

အချို့နေရာများတွင်မူ တဖာလုံအတွင်း သုံးလေးဆိုင်မကပင် တွေ့လာရသည်။ ယမကာလုလင်များကလည်း စည်လိုက်သမှကြက်ပျံမကျ။

သြော် . . . ထိုသူများလည်း တေဇောဓာတ်ရင်ငွေ့လှုံနေကြခြင်းပင်။ သို့သော်ထိုတေဇောက အသေစောမည့်တေဇောဖြစ်ကြောင်းကို အားလုံးအသိပင်။

“မျက်မှောက်ခေတ် စီးပွားဖြစ် ရေရှည်အကုသိုလ်လုပ်ငန်းပေါ့။ ကလေးလူကြီး၊ ကျားမ-မရွေးက အယ်လ်ကိုဟောနဲ့ ဇိမ်ခံရတာကို အပန်းဖြေစရာတခုလို သဘောထားတဲ့အပြင် ရောင်းသူကလည်းရောင်း နေကြတာပဲ။ ကျွန်မအမြင်တော့ ခေတ်ပျက်ဆိုင်ကနားလို့ ပြောရလားဘဲ။ လမ်းလွဲတာတော့ တော်တော်လွဲနေပြီ။ ငွေကြေးက မရှိမဖြစ် ဆိုတော့လည်း လုပ်နေကြတာပေါ့။ သူက ၁၀၀၀ ဖိုးရောင်းရင် ၅၀၀ မြတ်နေတဲ့အလုပ်လေ” ဟု မခင်မွန်(၂၄ နှစ်)က ပြောသည်။

ယင်းသို့ အရက်ဆိုင်၊ ဘီယာဆိုင်များ လွန်စွာပေါများလာခြင်းအပေါ် ဒေါက်တာကျော်စွာဦးက “စီးပွားရေးသမားကတော့ သူ့စီးပွားရေး အနေနဲ့လုပ်တာပေါ့။ ဆိုင်တွေများလာတာကြောင့် ဘယ်လိုပဲဖြစ်ဖြစ် တော်တော်များများ သောက်ဖြစ်လာကြတယ်။ ပြည်သူပိုင်းအနေနဲ့ တန်ဆေးလွန်ဘေးပေါ့၊ အရက်ကိုမသောက်ဖို့၊ သောက်ရင်လည်း လွန်လွန်ကျူးကျူးမသောက်ဘဲ ကိုယ့်ဘာသာ ထိန်းသိမ်းနိုင်ရင် ပိုကောင်း တာပေါ့” ဟု သုံးသပ်သည်။

အစိုးရဘက်မှလည်း ကောင်းမွန်သည့်ပေါ်လစီတခုနှင့်သွားရမည် ဖြစ်ကာ စီးပွားရေးသမားများအနေဖြင့်မူ ကျင့်ဝတ်ဥပဒေနှင့်အညီရောင်း ချလုပ်ကိုင်သင့်သည်ဟု ၎င်းကဆိုသည်။

တောင်ဒဂုံမြို့နယ်တွင်နေထိုင်သည့် အိမ်ထောင်ရှင်အမျိုးသမီးတဦးဖြစ်သော မသဉ္ဇာမြတ်နိုးကလည်း “အရင်တုန်းကဆို လက်ဖက်ရည်ဆိုင်ပဲထိုင်ကြတယ်။ အခု အရက်ဆိုင်ထိုင်မှ အလုပ်အကြောင်း ပြောလို့ရသလိုဖြစ်လာတယ်။ အရက်သောက်တော့ ကျန်းမာရေးထိခိုက်တယ်။ အလုပ်မသွားနိုင်တဲ့အခါ ၀င်ငွေထိခိုက်လာပြီး အိမ်ထောင်ရေး အပေါ်လည်း သက်ရောက်မှုတွေရှိလာတယ်” ဟု ဖွင့်ဟပြောဆိုသည်။

၂၀၀၈ ခုနှစ် ဖွဲ့စည်းပုံအခြေခံဥပဒေ ပုဒ်မ ၂၅၄။ (က)တွင် တိုင်းဒေသကြီး သို့မဟုတ် ပြည်နယ်များက ဇယား(၅)ပါ အခွန်အခများကို ဥပဒေ နှင့်အညီကောက်ခံ၍ တိုင်းဒေသကြီး သို့မဟုတ် ပြည်နယ်ဘဏ္ဍာရန်ပုံ ငွေသို့ပေးသွင်းရမည်။ (ခ)တိုင်းဒေသကြီး သို့မဟုတ် ပြည်နယ်များသည် တိုင်းဒေသကြီး သို့မဟုတ် ပြည်နယ်ဘဏ္ဍာရန်ပုံငွေများကို ဥပဒေနှင့် အညီ သုံးစွဲခွင့်ရှိသည်ဟု ပြဋ္ဌာန်းထားသည်။ ထိုပုဒ်မအား ရည်ညွှန်း လျက်ဇယား(၅)က တိုင်းဒေသကြီး သို့မဟုတ် ပြည်နယ်များက ကောက်ခံရမည့်အခွန်အခများကိုဖော်ပြရာ ၁။ မြေယာခွန်၊ ၂။ ယစ်မျိုးခွန် စသ ဖြင့်ပါရှိသည်။

ဖွဲ့စည်းပုံ အတည်ပြုပြီး ၄ နှစ်ခန့်အကြာ ၂၀၁၂ ခုနှစ်တွင် ပြည် ထောင်စု အခွန်ဥပဒေ ပေါ်ထွက်လာခဲ့ပြီးသော်လည်း မျက်မှောက်အချိန်ထိ ရန်ကုန်၊ မန္တလေး၊ နေပြည်တော်နှင့် ဧရာဝတီတိုင်းဒေသကြီး ၄ ခု တို့တွင်သာ ယစ်မျိုးခွန်ဥပဒေကို ရေးဆွဲပြဋ္ဌာန်းထားသေးသည်။ ကျန်ပြည်နယ်နှင့် တိုင်းဒေသကြီးများတွင် ပြဋ္ဌာန်းရန်လိုအပ်နေသေးသည်။

“ဒီတိုင်းဒေသကြီး လေးခုမှာ ယစ်မျိုးခွန်ကို ၄ ဆ၊ ၅ ဆ အထိ တိုးကောက်နေပြီ၊ ကျန်ဒေသတွေမှာကတော့ အရင်ရှိပြီးသား ဥပဒေ အတိုင်းပဲ ကောက်နေတယ်” ဟု ပြည်သူ့ကျန်းမာရေးဖောင်ဒေးရှင်းဥက္ကဋ္ဌ ဒေါက်တာသန်းစိန်က ပြောသည်။

ယစ်မျိုးလိုင်စင်ကို ပြည်ထဲရေးဝန်ကြီးဌာန လက်အောက်ရှိ အထွေထွေအုပ်ချုပ်ရေးဦးစီးဌာနမှသာ ချပေးခဲ့ခြင်း ဖြစ်သော်လည်း ယခုအခါ လိုင်စင်သစ်ထပ်မံချမပေးတော့ရန် ဌာနတွင်းနည်းဥပဒေအဖြစ် အမိန့်ပေးထားကြောင်း သိရသည်။ ယစ်မျိုးခွန် ဥပဒေပြဋ္ဌာန်းချက်ကြောင့် ယခင်က လိုင်စင်မရှိခဲ့သည့်ဆိုင်များမှာ ယခုအခါလိုင်စင်များရရှိသွားကြသည်။ တရားမ၀င် ချက်ရောင်းသော အရက်ဖိုများ၊ ဆိုင်များတရား ၀င်ဖြစ်လာသည်။

“ဒီလိုဖြစ်သွားတဲ့အတွက် ထိန်းချုပ်ဖို့ လိုလာတဲ့အခါမှာ ဥပဒေနဲ့ ထိန်းချုပ်လို့ လွယ်သွားတာပေါ့။ ဒါပေမဲ့ တချို့ထွေအုပ်တွေက လိုင်စင်ပွားတွေ လုပ်ကြတာရှိတယ်။ ဒါကိုထိန်းချုပ်ဖို့တော့ ကျွန်တော်တို့ ဖောင်ဒေးရှင်း အနေနဲ့လည်း ထပ်ပြီးတိုက်တွန်း ထားတယ်” ဟု ဒေါက်တာသန်းစိန်က ဖွင့်ဟသည်။

မြန်မာနိုင်ငံ၌ လူဦးရေ ၁၀၀၀ တွင် ၂၃ ဦးနှုန်း အရက် စွဲနေကြောင်း ကမ္ဘာ့ကျန်းမာရေး အဖွဲ့(WHO)မှ ထုတ်ပြန်ထားသည်။

“လာဘ်စားပြီး လိုင်စင်တွေ ထုတ်ပေးနေရင်တော့ များလာမှာပဲ။ များလာတော့ အမှု အခင်းတွေဖြစ်တယ်၊ ရန်ဖြစ်တယ်။ နောက် ဒီနိုင်ငံမှာ အရက်သောက်ရမယ့်အရွယ် ကန့်သတ်မှုတွေ ဘာတွေလဲဥပဒေအရ ထုတ်ထားတာမရှိ။ လူငယ်တွေလည်း ပျက်စီးဖို့ပိုလွယ်တယ်။ လူငယ်ထဲမှာမှ ပိုက်ဆံတတ်နိုင်တဲ့သူနဲ့၊ မတတ်နိုင်သူ ကွာသေးတယ်။ အရက် အမျိုးအစား တွေကအများကြီး။ သို့ပေမဲ့ ဈေးကြီးတဲ့အရက်က အရည်အသွေး ပိုမြင့်တော့ သောက်တာချင်း တူတောင် ဆေးစစ်ချက်က ကွာတတ်တယ်။ စိတ်ဓာတ်ပျက်ပြားမှုတွေလည်း တိုးလာတယ်။ လူငယ် အများစု အပျော်အပါးဘက်ပဲဦးတည်ပြီး လမ်းမှားရောက်နေပြီ” ဟု လှိုင်မြို့နယ်တွင်နေထိုင်သူ မကေခိုင်ဝင်း(၂၅နှစ်)က ပြောသည်။

ဥစ္စာယုတ်ခြင်း၊ ငြင်းခုံများစွာ၊ ရောဂါထူပြော၊ ကျော်စောမဲ့တုံ၊ မလုံအင်္ဂါ၊ ပညာနည်းရှား ဤ ၆ ပါးကား၊ သောက်စားသေစာအပြစ်တည်း ဟု ဗုဒ္ဓမြတ်စွာဘုရားရှင်၏ သုတ္တန်ဒေသနာတော်တွင် ဟောဖော်ဆုံးမ ထားသည်။ အလားတူ ခရစ်ယာန်၊ အစ္စလာမ်နှင့် ဟိန္ဒူစသောကိုးကွယ်ရာ ဘာသာတရား အသီးသီးတို့တွင်လည်း အရက်သေစာအားရှောင်ရှားရန် သွန်သင်ပညတ်ထားသည်များ ရှိကြသည်။ ထိုသို့ပညတ်မှုများရှိ နေသော်ငြား ယနေ့ခေတ်လူငယ်များအကြားတွင် အရက်၊ ဘီယာ သောက်သုံးမှုဓလေ့မှာ လှိမ့်၍စိမ့်ဝင်စွဲထင်နေလေရာ မိဘများနှင့်လူ ကြီးသူမများအဖို့ များစွာရတက်မအေးဖြစ်နေကြရသည်။


လူငယ်တွေ သောက်တာများလာရင် ဘာသာရေး၊ ကျန်းမာရေး နဲ့ယဉ်ကျေးမှုတွေ ထိခိုက်ပျက်စီးလာနိုင်တယ်ဆိုတဲ့ အသိပညာပေးလူ ငယ်ဖတ် စာအုပ်လေးတွေ ထုတ်ပေးသင့်တယ်” ဟု အင်းစိန်စာပုံနှိပ် တိုက်ပိုင်ရှင်ဒေါ်ခင်မြထွေးနိုင်က စာပေနယ်ပယ်မှရောင်းရင်းများအား ဆော်သြလိုက်သည်။

မြန်မာနိုင်ငံ ပုဂ္ဂလိကဆရာများအသင်းချုပ်ဥက္ကဋ္ဌ ဒေါက်တာဘိုင်အို က “ကလေးတွေရဲ့အကျင့်စာရိတ္တကို ကာကွယ်မယ့်ဥပဒေလိုအပ်တယ်၊ ပြည်ထောင်စုအဆင့်ဥပဒေကတော့ အကောင်းဆုံးပေါ့၊ အသက် ၁၈ နှစ်အောက် ကျောင်းသူကျောင်းသားအပါအ၀င် တခြား ဘယ်လူငယ်မဆို အကျင့်စာရိတ္တမပျက်ပြားဖို့ ပြတ်ပြတ်သားသား တားမြစ်ထိန်းကွပ်နိုင်မယ့် လုံလောက်တဲ့ ဥပဒေတွေလိုပါတယ်၊ ဘယ်ဥပဒေပဲ ထုတ်ထုတ် လက်တွေ့ကျင့်သုံးမှုက တမျိုးဖြစ်နေရင်တော့ လူထုရဲ့အခွင့်အရေးတွေကို ကာကွယ်ဖို့မဖြစ်နိုင်ပါဘူး။ မူးယစ်ဆေးဝါး၊ အရက်ကိစ္စတွေသာမက တည်းခိုခန်းကိစ္စတွေအထိ အများကြီးပါပဲ” ဟု ဆိုသည်။

ထို့ပြင် ဗိုလ်ချုပ်မွေးနေ့ဆိုလျှင် လွန်လေပြီးသော ၂၆ နှစ် ဟိုမှာ ဘက်ဆီက မဆလခေတ်အထိကို ကလေးများနေ့ဟု အစဉ်အဆက်သတ် မှတ်ခဲ့သော်လည်း နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ (န၀တ)အစိုးရတက်လာပြီးနောက်ပိုင်း တိုင်းပြည်တွင် အာရုံပြောင်းခံခဲ့ရကြောင်း ၎င်းက ထပ်လောင်းပြောကြားသည်။

“စတုတ္ထတန်း မြန်မာစာဖတ်စာက အောင်ဆန်းဇာနည်ဆိုတဲ့ ကဗျာလည်း ဖျောက်ပစ်ခဲ့ကြတယ်။ ဖေဖော်ဝါရီ ၁၄ ချစ်သူများနေ့ဆို ကျွန်တော်တို့ ယဉ်ကျေးမှုနဲ့ ဘာမှမဆိုင်ဘူးဗျ၊ ဒါကြီးကို အတင်းသွတ်သွင်းတဲ့အခါ လိင်ဖောက်ပြန်မှုတွေ၊ မလိုအပ်ဘဲအပျော်ကျူးတာတွေ တွေ့လာရတယ်။ သိသိကြီးနဲ့ လမ်းဖွင့်ပေးထားသလို ဖြစ်နေတယ်။ တက္ကသိုလ်ကျောင်းတွေ၊ အခြေခံကျောင်းတွေမှာ ပညာပေးရမယ်၊ ဒီလို နေ့ အပြုအမူမျိုးတွေကို နှိမ်နင်းပစ်ရမယ်။ ကျောင်းတွေဟာ စာမေးပွဲ ဦးစားပေးစနစ်ထက် ကလေးတွေ ဘက်စုံဖွံ့ဖြိုးရေးကို ဦးစားပေးရမယ်” ဟု ၎င်းက ဆိုသည်။
 
နိုင်ငံတကာတွင် အရက်ဆိုင်၊ ဘီယာဆိုင်များ၌ အမျိုးသမီးစားပွဲ ထိုးများ၊ ဘားကိုင်များဖြင့် ရောင်းချသည်မှာမဆန်းတော့။ သို့သော် မြန်မာ့ ယဉ်ကျေးမှုအရမူများစွာ အမြင်မတင့်လှပေ။ ထို့ကြောင့် ရှေးရိုးဓလေ့ ထုံးတမ်းယဉ်ကျေးမှုကို တန်ဖိုးထားသူများနှင့် အနောက်တိုင်း ယဉ်ကျေးမှု သက်ဝင်ထုံမွေ့သူများအကြား ကွာဟသည့်အမြင်များလည်း ပေါ်ပေါက် လာသည်။ လက်ရှိ ရန်ကုန်မြို့တွင် အတွေ့ရများနေသည်က အမျိုးသမီး စားပွဲထိုး၊ ဘားကိုင်များမဟုတ်၊ စားဝတ်နေရေးအခက်အခဲကြောင့် ရရာ အလုပ်ကိုလုပ်ကိုင်လျက် ယမကာဟူသော ကုန်ပစ္စည်းအား အရောင်းမြှင့် တင်ပေးရသည့် ကဗျာ(အမည်ရင်းမဟုတ်)ကဲ့သို့သော အမျိုးသမီးဝန်ထမ်းများပင်ဖြစ်သည်။ အရောင်းမြှင့်တင်ရေး ပရိုမိုတာဟုခေါ်ဆိုသော်လည်း စားပွဲထိုးများကဲ့သို့ပင် အရက်ငှဲ့ပေးရခြင်း၊ အပျင်းပြေစကားလက်ဆုံ ပြောပေးရခြင်းများလည်း ရှိနေသည်။

“ဒီလိုပုံစံမျိုး လုပ်ရမယ်ဆိုတာ အင်တာဗျူးကတည်းကသိတယ်လေ၊ တကယ်လုပ်ကြည့်တော့ နည်းနည်းကသိကအောက်ဖြစ်စရာလေး တွေကြုံရတယ်။ ဒါပေမဲ့ ကျွန်မကိုယ်ကျင့်သိက္ခာအပေါ်မှာတော့ လိပ်ပြာ သန့်ပါတယ်” ဟု ကဗျာက ရင်ဖွင့်သည်။

အရက်အတုဆိုသည်များကလည်း မကြာခဏကြားနေရသည်။ အရက်ကို ထိန်းချုပ်ရာတွင် ရောင်းချခြင်းနှင့် ၀ယ်ယူခြင်း နှစ်မျိုးလုံးအား ထိန်းချုပ်ရန်လိုကြောင်း သိရသည်။

“အရက်ရောင်းချိန်ကန့်သတ်ဖို့၊ မသန့်ရှင်းတဲ့ အရက်တွေ တင်မရောင်းဖို့၊ သတ်မှတ်တဲ့ အရက်ချက်စက်ရုံတွေကထုတ်တဲ့ အရက်ပဲ ရောင်းဖို့၊ ၁၈ နှစ်မပြည့်သေးတဲ့ကလေးတွေကိုမရောင်းဖို့ စတဲ့ နည်း ဥပဒေတွေ ပြဋ္ဌာန်းသွားရမယ်၊ စာသင်ကျောင်းအနီးပတ်ဝန်းကျင်၊ တရား ပွဲတွေ၊ သာသနာရေးအဆောက်အအုံတွေ အနီးမှာမရောင်းဖို့ တားမြစ် ရမယ်” ဟု ဒေါက်တာသန်းစိန်က ဆိုသည်။

ထို့ပြင် ၎င်းက “အရက်တွေရဲ့အရည်အသွေးကို စစ်ဆေးမှုပိုင်းမှာ အားနည်းနေတယ်။ အစားအသောက်နှင့် ဆေးဝါးကွပ်ကဲရေးဌာန (FDA)ဆို ဆေးဝါးပစ္စည်းလောက်ကိုပဲလုပ်နိုင်တယ်၊ အရက်ကို အသေး စိတ်မ၀င်နိုင်ဘူး” ဟု ထောက်ပြဝေဖန်သည်။

ကျန်းမာရေးရှုထောင့်မှသည် တိုင်းရေးပြည်ရာအထိ ဆက်စပ်လျက် ဒေါက်တာကျော်စွာဦးက “ပြည်သူတွေ ကျန်းမာရေးအသိရှိတယ်ဆို ဘာပဲဖြစ်ဖြစ် အဆင်ပြေနိုင်မယ်။ ဆေးရုံတွေမှာ အရက်ကြောင့်ဖြစ်တဲ့ လူနာတွေ အရမ်းများလာတယ်၊ အရင်တုန်းက အသက်ကြီးတဲ့သူတွေပဲ တွေ့ရပေမဲ့ အခုဆို ၃၀ ၀န်းကျင်နဲ့ အရက်သောက်လို့ လေဖြတ်နေတာတို့ ဘာတို့တွေ တော်တော်လေးတွေ့လာရတယ်။ အရက်သောက် နှုန်းက တော်တော်များလာတာ၊ ဒါဟာ တိုင်းပြည်အတွက်တော့ မကောင်းတဲ့ လက္ခဏာပဲ” ဟု မှတ်ချက်ပြုသည်။

သို့ဖြစ်ပါ၍ . . . သောက်မျိုလိုက်ပြီဆိုလျှင် ဖိန်းတိန်းရှိန်းတိန်း ယိမ်းတက်သွားစေသည့်ထိုအရည်ကိုမှ ချင်ခြင်းတက်သူများအနေဖြင့် မိမိကိုယ်တိုင်အတွက်လည်း အသည်း၊ အစာအိမ်၊ သွေးတိုး၊ နှလုံးနှင့် လေဖြတ်၊ အ၀လွန်၊ အရိုးပွမှသည် မိမိအား အတုယူမှားမည့် အနာဂတ် အစဉ်အဆက်အဖို့တိုင် ရှေးရှုကာ တစုံတရာဆုံဖြတ်ရန် အချိန်တန်ပြီ ဖြစ်ပါကြောင်း . . . ။
 
ကျော်လင်းထွန်း


(News Watch ဂျာနယ်တွင် ဖေဖော်ဝါရီလအတွင်းက ဖော်ပြခဲ့ပြီးဖြစ်သည်။)