“ ရထားစီးခြင်း ”

တကယ်လို့များဗျာ

အဲ့နေ့မတိုင်ခင်က အဲ့ဒီနေ့ကို

အပြည်ပြည်ဆိုင်ရာ ဖုန်းမပြောရနေ့အဖြစ်သာ

သတ်မှတ်ခဲ့မယ်ဆိုရင်ပေါ့

လယ်ကွင်းပြင်ကြီးတွေဟာ

ဆိုက်ပရက်(စ်) လမ်းပေါ်က စင်္ကြံ

ဖြစ်လာနိုင်ကောင်းရဲ့ . . .

ပြည့်ဝန်းဆူဖြိုးနေတဲ့ လ

ကံစေရာ ညအတွက်အဖော်

ငါဖျော်သောက်ခဲ့ပြီးတဲ့ ၀ီစကီ

သူမကတော့ (ဒီအချိန်ဆို)

အိပ်ပျော်နေလောက်ပါပြီ . . .

အသံလှိုင်းတွေရဲ့ ခွန်အားကပဲ ပါးလျလွန်းတာလား

ဖွင့်ထားရင်ကြားနိုင်မလားလို့

ပြတင်းတံခါးတွေကို ဆွဲတင်ပစ်လိုက်တယ်

ပိတ်လှောင်မွန်းကျပ်မှုတွေ

နှောင်တင်းနေတဲ့ သက်ပြင်းတွေနဲ့ပါ . . .

တဖိတ်ဖိတ် ပျိုးပြက်ဝင်းလက် လှပ

မရေတွက်နိုင်တော့လို့

လွှတ်ထားလိုက်ရတဲ့ ကြယ်ပွင့်ကလေးတွေ

သူမအိပ်ရာထဲ ပြန့်ကျဲနေပါစေ . . .

ဖောဖောသီသီ ပုတ်ခတ်နေမိတဲ့

စက္ခုအလင်းတံခါး

ခဏပြန်ပိတ်ထားလိုက်တယ်

(ဒီကောင်လေး အဖျားများတက်နေသလား ဟဲ့  . . . )

မဟုတ်ရပါဘူး အန်တီ

ငိုချင်စိတ်ကို ဖျစ်ညှစ်

ပဋ္ဌာန်းဒေသနာတော်ထဲ စိတ်နှစ်ထားရင်း

လာရောင်းနေတဲ့ (၈)ပတ် ပုလင်းပြားတွေကို

ထပ်မငေးမိအောင်

အအေးဓါတ်ကိုလည်း တော်လှန်တဲ့အနေနဲ့

(တဆတ်ဆတ်) ကွေးနေတာပါ . . .

ကောက်ရိုးမီးမြှိုက်နံ့

ကျွဲချေးနံ့

ငါ့ကိုယ်ပေါ်မှာ မသင်းပျံ့တော့တဲ့

ဘော်ဒီစပရေးနံ့ . . .

ချစ်သူလေးရေ

အိပ်လို့ပျော်ပါစေ

အိပ်ပျော်ပါစေ

တကယ်တော့ ငါဟာ

(မနေ့ညကတည်းက)

မနက်ဖြန်မနက်ဆိုတာကြီးကို

လန့်နေခဲ့ရသူပါ . . . ။                ။

ကျော်လင်းထွန်း